mathau o faethu

Maethu tymor byr yw pan fydd angen gofal ar blant a phobl ifanc am gyfnod byr o amser – gallai hyn fod ychydig ddyddiau, wythnosau, neu hyd at gwpl o flynyddoedd.

Mae’r math hwn o faethu yn aml yn angenrheidiol tra bod penderfyniadau yn dal i gael eu gwneud am y cynlluniau tymor hir ar gyfer plentyn neu berson ifanc. Gallai hynny olygu bod y plentyn neu’r person ifanc yn dychwelyd i’w deulu geni neu’n symud i ofalwr maeth tymor hir.

Mae maethu tymor byr yn darparu cartref sefydlog a chefnogol tra bod y penderfyniadau pwysig hynny’n cael eu gwneud.

Mae maethu tymor hir yn rhoi cartref parhaol i blant a phobl ifanc nad ydynt yn gallu byw gyda’u teuluoedd geni.

Mae’r math hwn o faethu yn cynnig sefydlogrwydd, cysondeb a diogelwch emosiynol dros nifer o flynyddoedd. Mae’n caniatáu i blant a phobl ifanc deimlo’n rhan o deulu cariadus, lle gallant dyfu a ffynnu.

Mae maethu tymor hir yn ddewis arall gwych i fabwysiadu.

Mae maethu seibiannau byr wedi’i gynllunio i gefnogi teuluoedd plant a phobl ifanc ag anableddau corfforol, anghenion dysgu ychwanegol, a/neu ymddygiadau sy’n herio.

Fel gofalwr maeth seibiannau byr, rydych chi’n cynnig amgylchedd  diogel a gofalgar – gallai hyn fod yn ystod y dydd, dros nos, neu ar benwythnosau.

Mae’r seibiannau hyn fel arfer yn cael eu cynllunio ymlaen llaw, gan roi amser i deuluoedd geni neu ofalwyr maeth eraill orffwys ac ymlacio. Rydych chi’n dod yn estyniad dibynadwy o rwydwaith cymorth y plentyn neu’r person ifanc hwnnw.

Mae maethu seibiant yn cefnogi teuluoedd geni a  gofalwyr maeth trwy gynnig gofal tymor byr wedi’i gynllunio.

Gall y lleoliadau hyn bara o un noson i benwythnos neu wythnos, yn dibynnu ar anghenion y plentyn neu’r person ifanc a’u gofalwyr.

Mae gofalwyr maeth seibiant yn chwarae rhan allweddol wrth gadw lleoliadau maethu yn gryf ac yn gynaliadwy.

Mae maethu rhiant a phlant yn fath arbenigol o faethu lle mae rhiant, weithiau’r ddau riant, a’r plentyn yn cael gofal gyda’i gilydd.

Mae’r math hwn o faethu yn helpu i gefnogi rhieni newydd i ddatblygu eu sgiliau rhianta mewn amgylchedd diogel, meithringar. Eich rôl yw tywys, annog a monitro eu cynnydd, gan helpu i sicrhau dyfodol gwell i’r rhiant/rhieni a’r plentyn.

Gall y trefniant hwn gynnwys brodyr a chwiorydd y plentyn sydd hefyd yn cael eu rhoi mewn gofal.

Darganfyddwch fwy am faethu rhieni a phlant.

Mae maethu therapiwtig ar gyfer plant a phobl ifanc sydd wedi profi trawma, esgeulustod a/neu golled sylweddol.

Gallai’r plant a’r bobl ifanc hyn fod ag anghenion emosiynol a/neu ymddygiadol cymhleth ac angen lefel uchel o ddealltwriaeth a gofal.

Bydd gan ofalwyr maeth therapiwtig brofiad blaenorol mewn gofal therapiwtig a/neu weithio gyda phlant a phobl ifanc sydd wedi profi trawma, esgeulustod a/neu golled sylweddol. Maent yn derbyn hyfforddiant arbenigol a chefnogaeth barhaus i’w helpu i ddarparu cartref diogel, iachaol.

Mae rhai pobl ifanc yn cyrraedd y DU heb eu teulu, yn chwilio am ddiogelwch a dechrau newydd.

Mae maethu plant digwmni sy’n ceisio lloches yn golygu cynnig sefydlogrwydd, gofal ac arweiniad wrth iddynt addasu i wlad a diwylliant newydd.

Byddwch yn eu cefnogi i feithrin sgiliau bywyd, magu hyder, a setlo i fywyd yn Sir Gâr.